संग्राम सत्तेचा वृत्तसेवा
ऑनलाईन नेटवर्क
शिर्डी- क्रांती युवक मंडळ प्रणित हनुमान जन्मोत्सव उत्सव समितीतर्फे शिर्डी येथे सालाबाद प्रमाणे शनिवारी (दि.१६) हनुमान जन्मोत्सव मोठ्या उत्साहात साजरा करण्यात आला. या दरम्यान शनिवारी सकाळी 10 वा. हनुमान मंदिरासमोरील शक्तीचे प्रतीक असलेला १२५ किलो वजनाचा बजरंग गोटा उचलणे स्पर्धा पाहण्यासाठी शिर्डीकरांसह साईभक्तांनी मोठी गर्दी केली होती. यामुळे ही स्पर्धा हनुमान जयंती उत्सवात मुख्य आकर्षण ठरली.
शनिवारी पहाटे ६.३० वाजता जन्मोत्सव साजरा होऊन ‘श्रीं’ना गंगेच्या पाण्याने मंगलस्नान घालण्यात आले. त्यानंतर महाआरती करून भक्तांना प्रसादाचे वाटप करण्यात आले. यावेळी स्पर्धेच्या प्रारंभी अविनाश गोंदकर यांच्या हस्ते बजरंग गोटा पूजन झाले. यावेळी बाळासाहेब गोंदकर, सुरेंद्र महाले, विशाल कोळपकर, योगेश गायके यांची प्रमुख उपस्थिती होती. तरुणांनी मोठया जोशात जय श्रीराम व श्री हनुमानाचा जयजयकार करत हा बजरंग गोठा उचलण्याचा प्रयत्न केला. ५० तरुणांनी हा गोटा उचलण्याचा प्रयत्न केला. या स्पर्धेत ११ तरुणांनी हा १२५ किलो वजनाचा बजरंग गोटा उचलला. या मनोज मयूर, सुरेश सुपेकर, सुरज रोकडे, सुदर्शन वेर्णेकर,राजू पांचाळ, मॉन्टी ठाकूर, सागर परदेशी, हर्षल अभंग, तसेच हिमाचल प्रदेशचे साईभक्त ठाकूर व गुजरातचे गांधी यांनी देखील गोटा उचलला. शेवटी सचिन तांबे यांनी गोटा उचलून स्पर्धेचा समारोप केला.
समितीच्या वतीने विजय गोंदकर यांच्या पुढाकारातून हनुमान यज्ञाचे आयोजन करण्यात आले. पूर्णाहुती भाजपचे तालुकाध्यक्ष ज्ञानेश्वर आबा गोंदकर यांच्या उपस्थिती झाले. यज्ञाचे पौरोहित्य लावर गुरुजी व ग्रामाचार्य सुशील रत्नपारखी यांनी केले. नुकतेच धनंजय सोनावणे यांची एमपीएससी मार्फत, महाराष्ट्र शासनाच्या सार्वजनिक बांधकाम विभागात (पीडब्ल्यूडी), सहाय्यक अभियंता ,श्रेणी-२(राजपत्रित अधिकारी) पदी ओबीसीमधून राज्यात ९ व्या क्रमांकाने निवड झाली. म्हणून नियुक्ती झाल्याबद्दल व मंडळाचे हितचिंतक सुरज कुमावत यांची नायब तहसीलदार झाल्याबद्दल सत्कार करण्यात आला.
सायंकाळी तरुणांच्या निरव्यसनतेचे प्रतीक असलेल्या चांदीच्या गदेचे पूजन व सायंकाळी महाआरती झाली. या उत्सवात बबलू वर्पे, आकाश वाडेकर, शुभम ताम्हाणे, अरुण हजारे,दादा शेळके, अतिक पठाण, शिवम अग्रवाल,साई धन कुलकर्णी, हृषीकेश वर्पे, अनंत लासूरे, साई सोनावणे,साई कुमावत यांच्यासह अनेक हनुमान भक्त मोठ्या संख्येने सहभागी झाले होते.
