सखाराम गोरे लिखित व गणराज प्रकाशनच्या “विसावा” या काव्यसंग्रहाचे प्रकाशन

हृदयकोशातील शब्दांनी कविता समृद्ध होते – उद्धव कानडे
संग्राम सत्तेचा वृत्तसेवा
Online Natwork
अहमदनगर-मातीत उगवणारी हरळी उपटून फेकून दिली.तरी ती पुन्हा उगवते.त्याप्रमाणेच कवी मनाच्या अंतकरणाला उपटून फेकून दिले. देशातून हद्दपार केले तरी तो जेथे जाऊन राहील तेथे कविता उगवेल. आकाश फाटते तेव्हा कादंबरी निर्माण होते.जमीन फाटते तेव्हा कथा निर्माण होते. जेव्हा काळीज फाटते.तेव्हाच कविता लिहिले जाते.त्याचप्रमाणे कवी सखाराम गोरे यांचे काळीज फाटले आहे.कवी सखाराम गोरे यांनी आपलं अनुभव विश्व जाणीव विश्व आणि भावविश्व समर्थपणे कवितेत मांडले आहे. वास्तवता,प्रामाणिकपणा आणि तरलता यामुळे स्वतःची स्वतंत्र मुद्रा या कवितांना प्राप्त झाली आहे.कवी सखाराम गोरे यांची कविता म्हणजे नुसता शब्दांचा खेळ नाहीतर तो दुःखांचा वेदनांचा भावनांचा कसदार मेळ आहे.प्रतिभावंत कवी स.रा.गोरे यांनी विसावा म्हटले असले तरी थांबू नये.लेखन सुरू ठेवावे. नदीच्या प्रवाहाला थांबण्याचा काय अधिकार असतो.सागरला जाऊन मिळावे लागते. त्याप्रमाणेच प्रतिभावंत कवीला थांबण्याचा अधिकार नसतो. कवितेच्या प्रवाहात भोवतालच्या समाजाला हिरवागार करता आलं पाहिजे.असे प्रतिपादन ज्येष्ठ साहित्यिक, अभ्यासक,महाराष्ट्र साहित्य परिषदे पुणे कार्यवाह उद्धव कानडे यांनी केले आहे. अहमदनगर जिल्हा वाचनालय येथे कवी सखाराम गोरे लिखित “विसावा” या काव्यसंग्रहाचे ज्येष्ठ साहित्यिक अभ्यासक,महाराष्ट्र साहित्य परिषद पुणे कार्यवाह उद्धव कानडे यांच्या हस्ते पुस्तक प्रकाशन सोहळा संपन्न झाला. याप्रसंगी कार्यक्रमाचे अध्यक्ष ज्येष्ठ साहित्यिक चंद्रकांत पालवे, मराठी अभ्यास मंडळ व मानव विज्ञान विद्या शाखा,सावित्रीबाई फुले पुणे विद्यापीठाचे सदस्य प्रा.डॉ.संदीप सांगळे,मसापचे सदस्य जयंत येलुलकर,प्रा. मेधाताई काळे,प्रा.खासेराव शितोळे,लेखक प्रदीप वाघोले, दिलीप पांढरे,कवी सखाराम गोरे, प्रकाशक प्रा.गणेश भगत आदी मान्यवर विचारपीठावर उपस्थित होते.
प्रा.मेधाताई काळे म्हणाल्या, कवी सखाराम गोरे यांनी त्यांच्या कवितेतून हिरवागार शालू,हिरवा बांध,हिरवा निसर्ग, हिरवी झाडे असा उल्लेख केलेला आहे. कवींना हिरव्या रंगाची आवड दिसून येते.विसावा या कवितांच्या माध्यमातून भावविश्व निर्माण केले आहे.विसावा जरी म्हणले तरी क्षणभर विश्रांती घेऊन पुढे उत्साहाने काव्य लेखन करावे.काव्य प्रेमी रसिक आपल्या साहित्याची वाट पाहत आहेत. कविवर्य चंद्रकांत पालवे म्हणाले, कविवर्य सखाराम गोरे हे माझे मित्र आहेत तीस ते चाळीस वर्षापासून मी त्यांचा एक मित्र म्हणून त्यांच्या कवितांचे वाचन करीत आहे. काव्य रसिकांना त्यांच्या कविता नेहमीच आवडले आहे त्यांची कविता रसिकांच्या मनाला भुरळ घालीत आहे. प्रतिभावंत कवी विसावा घेऊ शकत नाही.मनातील कविता काढून टाकले तर कवीच्या जगण्याला अर्थ राहत नाही.एका प्रसिद्ध कवी कवीने असे सांगितले आहे की, ज्या दिवशी माझी कल्पना संपेल त्या दिवशी मी कविता सोडेल.कविता सोडल्यावर पत्नीचे प्रेम,नातवांचे प्रेम,मित्रपरिवार दिसणार नाही, रस्ते दिसणार नाही म्हणून थांबू नका. प्रा.खासेराव शितोळे म्हणाले, कविवर्य सखाराम गोरे यांनी लहानपणापासूनच कवी मन जपले आहे.त्यांनी विसावा या काव्यसंग्रहाच्या माध्यमातून आपल्या भावना प्रगट केले आहेत.लेखकाला अनुभूती आली त्याची प्रचिती वाचकास येणे.हे सामर्थ्यवान कवीच्या काव्यसंग्रहातून दिसून येते. कविवर्य सखाराम गोरे यांनी विसावा न घेता पुढे आणखी काव्यनिर्मिती करावी. प्रा.डॉ.संदीप सांगळे म्हणाले, अहमदनगर जिल्ह्याचे भूषण असलेले कविवर्य सखाराम गोरे यांच्यासारख्या साहित्यिकांनी लेखनाचा विसावा घेणे म्हणजे त्यांच्यावर आणि त्यांच्या सिद्ध हस्तलेखनीवर प्रेम करणाऱ्या असंख्य वाचकांवर अन्याय म्हटले पाहिजे.संख्यात्मक साहित्यापेक्षा गुणात्मक लेखनाचा आग्रह धरणारा हा गुणी कवी म्हणूनच विसावा या त्यांच्या प्रस्तुत काव्यसंग्रहाचे कौतुक करावे.तेवढे थोडेच आहे.
जयंत येलुलकर म्हणाले,सेवा निवृत्तीनंतर पाच पुस्तकांचे लेखन करून कविवर्य सखाराम गोरे यांच्या काव्यसंग्रहाची निर्मिती समाजासाठी मार्गदर्शक आहे. येणाऱ्या काळात साहित्य चळवळीत टाकलेले हे त्यांचे पहिले पाऊल आहे. कवी सखाराम गोरे म्हणाले, ‘विसावा’ म्हणजे ओळीने वीस क्रमांक नव्हे,तर विश्रांती,आराम या अर्थी.साहित्य लेखनातील थांबा.मनाला कोठे तरी विरक्ती वाटली.करिता मी हा लेखन प्रपंच थांबविण्याचा निर्णय घेतला. मोठ्या दुःखद अंतःकरणाने ‘विसावा’ घेताना मनाला वेदनेच्या असंख्य इंगळ्या उसल्या. माणसाने कोठेतरी थांबले पाहिजे,विसावा घेतलाच पाहिजे. नाही तर ‘अति तेथे माती’ होते, असो.या कविता संग्रहात प्रेमाच्या,भक्तीच्या,जास्तीत जास्त पावसाच्या आणि इतर विषयांवर कविता आहेत.म्हणतात ना ‘दिवा विझताना मोठा होतो’ तसेच काहीसे माझे झाले.कविता काळजातून पाझरली पाहिजे. कवितेची उर्मी आली की मन कसं अस्वस्थ,बेचैन व्हायचे.दिवस असो की रात्रीचा कोणताही प्रहर असो,कविता कागदावर उतरल्यावरच मनाची तगमग शांत होते.
प्रा.गणेश भगत म्हणाले, कवी सखाराम गोरे यांनी प्राथमिक शाळेत ज्ञानदानाचे पवित्र कार्य केले.सेवानिवृत्तीनंतर समाजासाठी काहीतरी द्यावे म्हणून साहित्य निर्मिती केली. कविवर्य स.रा.गोरे यांनी सुगंधी फुले (कविता संग्रह),घालमेल (कविता संग्रह),आभाळ माया (कविता संग्रह),आघात(कथा संग्रह)विसावा(कविता संग्रह) या पुस्तकांचे प्रकाशन गणराज प्रकाशन च्या वतीने करण्यात आले.
प्रा.डाॅ.रामदास टेकाळे यांनी सुत्रसंचलन केले. आभार शिवप्रसाद गोरे यांनी मानले.कार्यक्रमाच्या यशस्वीतेसाठी संतोष कुमार गोरे,शिवप्रसाद गोरे, लेखिका स्वाती अहिरे,शामा मंडलिक, जालिंदर बोरुडे आदींनी विशेष परिश्रम घेतले.