संग्राम सत्तेचा वृत्तसेवा
ऑनलाईन नेटवर्क
नेवासा ः तालुक्यातील झापवाडी येथे अनोळखी महिलेचा निघृणपणे खून करणारा आरोपी पकडण्यात अहिल्यानगर एलसीबी टीमला यश आले आहे. महादेव आनंदा महारनवर (वय 55, रा.एकेरीवाडी, पो.देलवडी, ता.दौंड, जि.पुणे) असे पकडण्यात आलेल्याचे नाव आहे.
एसपी राकेश ओला, श्रीरामपूर अपर पोलिस अधीक्षक वैभव कलुबर्मे, शेवगाव डिवायएसपी सुनिल पाटील यांच्या मार्गदर्शनाखाली अहिल्यानगर एलसीबीचे पोनि दिनेश आहेर यांच्या सूचनेनुसार एलसीबीचे सपोनि हेमंत थोरात व पोलीस अंमलदार ज्ञानेश्वर शिंदे, संदीप दरंदले, सोमनाथ झांबरे, फुरकान शेख, किशोर शिरसाठ, प्रशांत राठोड, संतोष खैरे, महादेव भांड आदींच्या टीमने ही कारवाई केली.
याबाबत समजलेली माहिती अशी की, दि.16 सप्टेेंबर 2024 रोजी झापवाडी शिवारात मुळा पाठालगत असलेल्या शेतामध्ये अज्ञात आरोपीने अनोळखी महिला वय अंदाजे 60 वर्षे हिचा गळा आवळून जिवे ठार मारले. या घटनेबाबत सोनई पोलिस ठाण्याचे पोसई सुरज मेढे यांनी दिलेल्या फिर्यादीवरून सोनई पोलिस ठाण्यात गुरनं. 387/2024 बीएनएस कलम 103 (1) प्रमाणे खूनाचा गुन्हा दाखल करण्यात आला होता. ही घटना घडल्यानंतर एसपी राकेश ओला यांनी एलसीबीचे पोनि श्री. आहेर यांना या खून गुन्ह्याचा समांतर तपास करुन गुन्हा उघडकिस आणण्याबाबत आदेशित केले होते.
या घटना घडल्यानंतर एलसीबी टीमने घटना ठिकाणच्या परिसरात सोनई, घोडेगाव, शनिशिंगणापूर परिसरातील सीसीटीव्ही फुटेजची माहिती घेतले. जिल्ह्यातील मिसींग महिलेबाबत माहिती घेऊन, अनोळखी मयत महिलेचे फोटो सोशल मिडीया व गुप्त बातमीदारास प्रसारीत केले होते. यावरून तपास पथकाने मयत अनोळखी महिला जिजाबाई भाऊसाहेब रूपनवर (वय70, रा.एकेरीवाडी, पो.देलवडी, ता.दौंड, जि.पुणे) ही असल्याचे निष्पन्न झाले. तपासी एलसीबी टीमने गुन्हयांच्या तपासामध्ये कोणताही पुरावा नसताना, मयत महिलेचे राहत्या ठिकाणीच्या आजुबाजूस राहणार्‍या लोकांकडे विचारपुस केली असता, आरोपी व मयत महिलेने आरोपीचे दुचाकीचा खराब झालेला बल्ब (काष्टी ता.श्रीगोंदा) येथील गॅरेजमध्ये नवीन टाकलेला असल्याची माहिती मिळाली. यावरून तपास पथकाने काष्टी (ता.श्रीगोंदा) येथील सर्व दुचाकी गॅरेजमध्ये माहिती घेऊन अनोळखी मयत महिलेची ओळख पटविली.
तपासी टीमने काष्टी (ता.श्रीगोंदा) येथील दुचाकी गॅरेज, सीसीटीव्ही फुटेज व तांत्रिक विश्लेषणाचे आधारे तपास करत असताना दि.14 ऑक्टोबर 2024 रोजी गुन्हा हा आरोपी महादेव आनंदा महारनवर (रा.एकेरीवाडी, पो.देलवडी, ता.दौंड, जि.पुणे) याने गुन्हा केला असल्याचे निष्पन्न झाले. तपासी टीमने तात्काळ एकेरीवाडी (पो.देलवडी ता.दौंड) येथे जाऊन संशयीतांचा शोध घेत असतांना एकजण मिळून आल्याने त्यास ताब्यात घेतले.
ताब्यात घेतलेल्या संशयीतांना त्याचे नाव गांव विचारले असता त्याने त्याचे नाव सांगितले. त्याच्याकडे घडलेल्या़ खून गुन्ह्याच्या अनुषंगाने विचारपुस करता दि.15 सप्टेेंबर2024 रोजी 12 वाजण्याच्या सुमारास तो मयत महिला जिजाबाई भाऊसाहेब रूपनवर हिच्यासह दुचाकीवरून एकेरीवाडी येथून शनिशिंगणापूरकडे जात होते. झापवाडी शिवारात मुळा पाठाजवळ मयत महिला हिने गाडी थांबवून आरोपीसह शेतामध्ये पूजा करीत असताना, मयत महिला ही आरोपीवर काहीतरी जादुटोणा करीत असल्याच्या संशयावरून आरोपीने तिच्या गळयातील स्कार्पने गळा आवळून तिस जीवे ठार मारल्याचे सांगितले. तसेच मयत महिलेच्या गळयातील व कानातील सोन्याचे दागिणे काढून नेलेले होते. गुन्ह्याच्या तपासामध्ये 56 हजार रूपये किंमतीचे 8 ग्रॅम वजनाचे सोने हस्तगत करण्यात आले आहे. ताब्यातील आरोपीस सोनई पोलीस ठाण्यात गु.र.नं.387/2024 बीएनएस कलम 103 (1) या गुन्ह्याचे तपासकामी मुद्देमालासह सोनई पोलीस ठाण्यात हजर करण्यात आले. पुढील तपास सोनई पोलीस करीत आहे.
