खुनाचा प्रयत्न करणारे, सुपारी घेणारे जेरबंद : ‘नगर एलसीबी’ची कारवाई

खुनाचा प्रयत्न करणारे, सुपारी घेणारे जेरबंद : ‘नगर एलसीबी’ची कारवाई
संग्राम सत्तेचा वृत्तसेवा
ऑनलाईन नेटवर्क
नगर : नेवासा फाटा येथे वाहनाची धडक देऊन खुनाचा प्रयत्न करणारे व सुपारी घेणारे मारेकरी यांना पकडण्याची महत्त्वपूर्ण कारवाई नगर एलसीबी टिम’ने केली आहे. शिवनाथ ज्ञानदेव चावरे (वय ४१, रा. जळके खुर्द, ता. नेवासा, जि. अहमदनगर), ज्ञानदेव उर्फ नारायण सुर्यभान लष्करे (वय ४२, रा. पावन गणपती मंदीरासमोर, नेवासा), संदीप साहेबराव धनवडे (वय ३९, रा. भेंडा खुर्द, ता. नेवासा, जि. अहमदनगर) अशी पकडण्यात आलेल्यांची नावे आहेत.
एसपी राकेश ओला, श्रीरामपूर अपर पोलीस अधिक्षक वैभव कलुबर्मे व शेवगाव डिवायएसपी सुनिल पाटील यांच्या मार्गदर्शनाखाली एलसीबीचे पोनि दिनेश आहेर यांनी दिलेल्या सूचनेनुसार पोउपनि तुषार धाकराव, पोलीस अंमलदार गणेश भिंगारदे, अतुल लोटके, संतोष लोढे, ज्ञानेश्वर शिंदे, फुरकान शेख, संदीप दरंदले, विशाल तनपुरे, प्रशांत राठोड, बाळासाहेब गुंजाळ, अरुण मोरे आदींच्या टिमने ही कारवाई केली आहे.
याबाबत समजलेली माहिती अशी की, दि.१६ ऑक्टोबर २०२४ रोजी सकाळी ९.३० वाजण्याच्या सुमारास चुलत भाऊ शंतनु पोपट वाघ हा त्याच्याकडील शाईन दुचाकीवरुन त्याच्या घरुन निघून खडकाफाटा येथील खडीक्रेशवर जात असतांना बोलेरो गाडीमधील आरोपीने कटकारस्थान करुन त्याचा पाठलाग करुन बोलेरो गाडीने शाईन दुचाकीला जोराची धडक देऊन जिवे ठार मारण्याचा प्रयत्न केला होता,या श्रृती सौरभ पोखरकर (रा. बालेवाडी, स्टेडीयम जवळ, म्हाळुंगे, ता. जि. पुणे) यांच्या फिर्यादीवरून नेवासा पोलीस ठाण्यात गु.र.नं. ७७६/२०२४ भारतीय न्याय संहिता २०२३ चे कलम १०९,६१ (२) प्रमाणे खुनाचे प्रयत्नाचा गुन्हा दाखल करण्यात आला आहे.
एसपी राकेश ओला यांनी गुन्ह्यामध्ये आरोपी निष्पन्न नसल्याने व गुन्हा गंभीर स्वरुपाचा असल्याने गुन्ह्याचा तपास स्थानिक गुन्हे शाखेकडे वर्ग करुन गुन्ह्यातील आरोपींचा शोध घेऊन गुन्हा उघडकीस आणण्याबाबत एलसीबी पोनि दिनेश आहेर यांना आदेश दिलेले आहेत. आदेशान्वये पोनि श्री आहेर यांनी एलसीबीचे पथक तयार करुन गुन्ह्यातील आरोपी निष्पन्न करुन आरोपी अटक करण्याबाबत आदेश देण्यात आले होते.
एलसीबीच्या टिमने घटनाठिकाणी भेट देऊन तसेच जखमीचे घरापासून ते घटनाठिकाणापर्यंतचे सीसीटीव्ही. फुटेज चेक केले असता त्यामध्ये जखमीचे दुचाकीचा एक पांढरे रंगाची बोलेरो गाडी पाठलाग करतांना दिसून आली. बोलेरो गाडीवरुन आरोपींचा शोध घेत असतांना तांत्रिक विश्लेषणाचे आधारे व गुप्त बातमीदाराकडून मिळालेल्या माहितीवरुन आरोपी शिवनाथ ज्ञानदेव चावरे, ज्ञानदेव उर्फ नारायण सुर्यभान लष्करे, संदीप साहेबराव धनवडे यांना ताब्यात घेण्यात आले आहे.
ताब्यात घेण्यात आलेल्या आरोपींकडे गुन्ह्याच्या कारणाबाबत सखोल व बारकाईने तपास करता आरोपी शिवनाथ चावरे याचे भाचीचे सन २०२२ मध्ये जखमी शंतनु पोपट वाघ (रा. नेवासा खुर्द, ता. नेवासा, जि. अहमदनगर) याच्यासोबत लग्न झालेले होते. मागील एक वर्षापूर्वी शिवनाथ चावरे याच्या भाचीने गळफास घेऊन आत्महत्या केली आहे. त्या द्वेषातून आरोपी शिवनाथ चावरे गुन्ह्याचा कट रचून याने रेकॉर्डवरील आरोपी ज्ञानदेव उर्फ नारायण सुर्यभान लष्करे, संदीप साहेबराव धनवडे व त्यांचे इतर साथीदारांना सुपारी देऊन गुन्हा घडवून आणला असल्याचे सांगितले आहे.
ताब्यातील आरोपी ज्ञानदेव उर्फ नारायण सुर्यभान लष्करे हा रेकॉर्डवरील गुन्हेगार असुन त्याच्याविरुध्द खूनाचा प्रयत्न, दंगा करणे असे एकूण ४, व आरोपी संदीप साहेबराव धनवडे याच्याविरुध्द जबरी चोरी, दंगा करणे असे २ गुन्हे दाखल आहेत. गुन्ह्याचा पुढील तपास एलसीबीचे पोउपनि तुषार धाकराव हे करीत आहे. आणखी आरोपी निष्पन्न होण्याची शक्यता आहे.

Related Articles

LEAVE A REPLY

Please enter your comment!
Please enter your name here

Stay Connected

0FansLike
3,912FollowersFollow
22,200SubscribersSubscribe
- Advertisement -spot_img

Latest Articles

error: Content is protected !!