संग्राम सत्तेचा वृत्तसेवा
Online Natwork
अहमदनगर : येथील केडगांव बायपास हॉटेल के-९ समोर गोळीबार करुन खुनासह जबरी चोरी करणारे, संगमनेर तालुक्यातील साकुर येथे भगवान पेट्रोल पंपावरील कर्मचा-यांना चाकुचा व गावठी कट्टयाचा धाक दाखवून रोख रक्कम बळजबरीने चोरणारी व घारगाव शिवारातील लक्ष्मी टायर्सचे दुकानातील जबरी चोरी करणारी सराईत तिघा चोरट्यांच्या टोळीस पकडण्यात अहमदनगर एलसीबी टिम’ला यश आले आहे.
अजय भाऊसाहेब चव्हाण (वय २५, रा. वळणपिंप्री, ता. राहुरी), सागर वसंत जाधव ( वय २६, रा. वळणपिंप्री, ता. राहुरी) व राजेंद्र भाऊसाहेब शिंदे (वय २७, रा. खेडले परमानंद, ता. नेवासा) असे अटक करण्यात आलेल्यांची नावे आहेत, अशी माहिती अहमदनगर एसपी राकेश ओला यांनी रविवारी (दि.५) आयोजित पत्रकारपरिषदेत दिली. यावेळी अहमदनगर एलसीबी पोनि अनिल कटके यांच्यासह एलसीबी टिम’ उपस्थित होते.
एसपी राकेश ओला, अपर पोलीस अधिक्षक प्रशांत खैरे,श्रीरामपूर अपर पोलीस अधिक्षक श्रीमती. स्वाती भोर मॅडम, नगर शहर डिवायएसपी अनिल कातकाडे, शिर्डी व अतिरिक्त प्रभारी संगमनेर डिवायएसपी संजय सातव मार्गदर्शनाखाली एलसीबीचे पोसई सोपान गोरे, पोहेकॉ मनोहर गोसावी, दत्तात्रय गव्हाणे, संदीप घोडके, पोना ज्ञानेश्वर शिंदे, शंकर चौधरी, विशाल दळवी, रविकुमार सोनटक्के, दिपक शिंदे, पोकाॅ. सागर ससाणे, रोहित येमुल, रणजित जाधव, मयुर गायकवाड, मेघराज कोल्हे, मपोना भाग्यश्री भिटे, चापोहेकॉ उमाकांत गावडे, संभाजी कोतकर व चापोना भरत बुधवंत आदिंच्या ‘टिम’ने ही कामगिरी केली.
याबाबत समजलेली माहिती अशी की, मित्रा सोबत हॉटेल के ९ समोर, दारुपित बसलेले असतांना अनोळखी तीनजण हातात चाकू व पिस्टल घेऊन आले व गळ्याला चाकू लावून तुमच्या जवळील पैसे काढून द्या, असे म्हणताच फिर्यादी व त्यांचा मित्र पळू लागताच एकाने हातातील पिस्टलने मित्र शिवाजी किसन ऊर्फ देवा होले याच्यावर गोळीबार करुन त्याचा खून केला व डोळ्यात मिरचीपुड टाकून त्यांच्याजवळील रोख व मोबाईल फोन असा एकूण ६ हजार रुपये किंमतीचा मुद्देमाल बळजबरीने चोरून नेला आहे, या अरुण नाथा शिंदे ( रा. नेप्ती, ता. नगर) यांच्या फिर्यादीवरून कोतवाली पोलीस स्टेशन गु.र.नं. ९८६ / २०२३ भादविक ३९७, ३०२, ३४ सह आर्म अॅक्ट ३/२५ प्रमाणे खुनासह जबरी चोरीचा गुन्हा दाखल करण्यात आला होता.
गुन्ह्याचा समांतर तपास सुरु असतांना दि. २६ फेब्रुवारी २०२३ रोजी घारगांव शिवारात रात्रीचे वेळी अनोळखी तिघांनी पुणे ते नाशिक जाणारे रोड लगत असलेल्या लक्ष्मी टायर पंक्चर दुकानात प्रवेश करुन चाकुचा धाक दाखवून दुकानातील इसमाजवळील व दुकानासमोरील ३४ हजार ५०० रुपये किंमतीची दुचाकी, मोबाईल व रोख रक्कम बळजबरीने चोरुन नेली होती.
तसेच पुढे जाऊन त्याच तिघाच्या टोळीने साकुर ते मांडवे जाणारे रोडवर, भगवान पेट्रोलपंप, साकुर, ता. संगमनेर येथे पंपावर काम करणारे कर्मचा-यांना चाकू व गावठी कट्ट्याचा धाक दाखवून पंपावरील २ लाख ५० हजार ७४७ रुपये रोख असा एकूण २ लाख ८५ हजार २४७ रुपये किंमतीचा मुद्देमाल बळजबरीने चोरुन नेला होता. या दोन्ही घटनेबाबत घारगांव पोलीस ठाण्यात गु.र.नं. १३/२०२३ भादविक ३९२, ३९४ सह आर्म अॅक्ट ३/२५ प्रमाणे जबरी चोरीचा गुन्हा दाखल करण्यात आला होता. या घटना घडल्यानंतर घटनेचे गांभिर्य लक्षात घेऊन एसपी राकेश ओला यांनी घटना ठिकाणी भेट देवुन अहमदनगर एलसीबी पोनि अनिल कटके यांना एलसीबीचे स्वतंत्र पथके नेमून गुन्ह्याचा समांतर तपास करुन आरोपींचा शोध घेऊन गुन्हा उघडकीस आणण्याबाबत आदेश दिले होते.
एलसीबी पोलीस अधिकारी व अंमलदार यांच्या विशेष पथकांची नेमणूक करुन तपासकामी तात्काळ रवाना केले.विशेष पथकातील पोलीस अधिकारी व अंमलदार यांनी अहमदनगर जिल्ह्यातील रेकॉर्डवरील गुन्हेगारांची माहिती संकलीत करुन त्यावरुन गुन्ह्याचे तपासास सुरुवात केली. तसेच अहमदनगर शहर व नगर तालुका परिसर तसेच बायपास व इतर रोडवरील हॉटेल, लॉज, ढाबे व पेट्रोल पंपावरील सीसीटीव्ही फुटेज प्राप्त करुन त्या आधारे तांत्रिक विश्लेषणाद्वारे आरोपींची माहिती घेत होते. दरम्यान एलसीबी पोनि अनिल कटके यांना माहिती मिळाली की, केडगांव बायपास रोडवरील खुनाचा गुन्हा, साकुर (ता. संगमनेर) येथील भगवान पेट्रोलपंप जबरी चोरीचा गुन्हा व घारगाव शिवारातील लक्ष्मी टायर दुकानातील जबरी चोरीचा गुन्हा हा आरोपी अजय चव्हाण, (रा. वळणपिंप्री, ता. राहुरी) याने त्याचे साथीदारासह केला आहे. तो त्याचे घरी आला असून आता गेल्यास मिळून येईल. ही माहिती पोनि श्री. कटके यांनी एलसीबी टिम’ला कळवून खात्री करुन कारवाई करण्याबाबत आदेश दिले. एलसीबी टिम’ तात्काळ वळणपिंप्री, (ता. राहुरी) येथे जाऊन संशयीताचे वास्तव्याबाबत माहिती घेतली. त्याचे राहत्या घराजवळ सापळा लावून थांबलेले असताना संशयीत आरोपी अजय चव्हाण हा घरात असल्याची खात्री होताच पथकाने त्याचेवर झडप घालून त्यास शिताफीने ताब्यात घेतले. ताब्यात घेतलेल्या संशयीतास पोलीस पथकाची ओळख सांगुन त्यास त्यांचे नाव गांव विचारले असता त्याने त्याचे नाव अजय भाऊसाहेब चव्हाण (वय २५, रा. वळणपिंप्री, ता. राहुरी) असे असल्याचे सांगितले. यांचेकडे घडलेल्या गुन्ह्याबाबत विचारपुस करता सुरुवातीस तो समाधानकारक उत्तरे न देता उडवाउडवीची उत्तरे देवू लागला. त्यास अधिक विश्वासात घेऊन सखोल व बारकाईने चौकशी केली असता त्याने त्यांचे इतर दोन साथीदारांसह केडगांव बायपास, अहमदनगर येथे गावठी कट्टयातून गोळीबार करुन गुन्हा केल्याची कबुली दिली. तसेच घारगांव शिवारातील लक्ष्मी टायर पंक्चर दुकान व भगवान पेट्रोल पंप साकुर, (ता. संगमनेर) येथे पेट्रोल पंपावरील कर्मचा-यांना चाकू व गावठी कट्ट्याचा धाक दाखवुन जबरी चोरी केल्याची कबुली दिल्याने पुढील तपास करुन त्याचे इतर दोन साथीदारांचा शोध घेऊन त्यांना त्यांचे राहत्या घरातून ताब्यात घेतले. त्यांना त्यांची नावे व पत्ता विचारले असता त्यांनी त्यांची नावे सागर वसंत जाधव (वय २६, रा. वळणपिंप्री, ता. राहुरी), राजेंद्र भाऊसाहेब शिंदे (वय २७, रा. खेडले परमानंद, ता. नेवासा) अशी असल्याचे सांगितले. त्याच्याकडे गुन्ह्याबाबत विचारपुस केली असता त्यांनी त्यांचा साथीदार अजय भाऊसाहेब चव्हाण याच्यासोबत गुन्हे केले असल्याची कबुली दिली. ताब्यातील तिन्ही आरोपींना पुढील कायदेशीर कारवाईकामी कोतवाली पोलीस ठाण्यात हजर केले. पुढील तपास कोतवाली पोलीस करीत आहे.
यापूर्वी आरोपी अजय भाऊसाहेब चव्हाण हा सराईत गुन्हेगार आहे. त्याच्याविरुध्द अहमदनगर, पुणे व औरंगाबाद जिल्ह्यात जबरी चोरी, चोरी व सरकारी कामामध्ये अडथळा निर्माण करणे असे एकुण ११ गंभीर स्वरुपाचे गुन्हे दाखल आहे.
